قصة عصبونه
———–
الواير الموصل للاشارات العصبيه
المخ عباره عن غرفة تحكم معقده فيها ملايين الاعصاب وكل عصبونه فيهم مسئوله عن توصيل اشاره معينه لمكان معين
مثل اللي يوصل لنا البيتزا
بس تحس ان هذا موظفينه شركة البيتزا حقنا بس
يعني من نشيل التلفون تلقاه واقف جدام باب بيتكم
والمخ قاعد يرسل اشارات عصبيه لتزبيط المسائل بالجسم
منها اللي شغال ومستمر بالتوصيل مايوقف وعارف مهمته
ومنها اللي حاط رجل على رجل ومايروح الا لما يقوله المخ .. ياولد طالبينك تنقل هالرساله لهالمكان
ملايين الاشارات وملايين الطلبيات
وكل واحد عارف مهمته وعارف شغلته بالظبط
وعايشين في ثبات ونبات .. عاد يخلفون صبيان وبنات ..هذي مادري عنها .. وماحب اتكلم بشي ماعرفه
الاشارات اللي تنقلها العصبونات تتنقل بهالمسارات المعقده بسهوله .. وكل واحد عارف طريقه وعارف متى يلف ومتى يرجع وعارف قانون المرور اللي بالمخ
وعمره محد سواله مخالفه .. ولا حتى مخالفة ممنوع الوقوف
واللي مخلي هالاشارات ماتدش ببعض وتتداعم وتعفس الدنيا
اهي المايلينات .. كل مايلينه مغطية العصبونه ولافه جسمها عليها مثل البلاستيك اللي على وايرات الكهربا
عشان الاشاره وهي طالعه ماشيه ماتطلع لايمين ولا يسار
لأن كل مايطق براس اشاره عصبونية انها تتسلى بالطريج وهي رايحه توصل الطلب .. ويمكن تحب تسولف مع اشاره ثانية
تلاقي المايلينه ماسكه عصا وتخزها وتقولها تعوذي من الشيطان .. وكملي شغلج .. يالله (طبعا الشده وعدم التهاون مطلوبه بهالأمور)
والاشاره العصبية سواء حطت رجلها ومشت بسرعه جنونية والا قعدت تتمشى شوي شوي
ماتفرق عند المايلينه شي .. لأن المايلينه بكل الحالات متطمنه ان هالعصبونه مخليه اشارتها العصبية على خط واحد
والمخ دايما يسوي اجتماع للعصبونات ويقولهم .. امشي عدل يحتار عدوك فيك !!!
بس .. منو عدو هالعصبونات؟؟؟
خلال الاربعين سنه الماضية .. بدت حركة تمرد بقيادة كور بيض منتهيه وبايعتها
ومو عاجبها العجب .. وتحب تتصرف بمزاجها
وتمرد هالكور البيض .. أدى الى مشكله صحية مازال يعاني منها ملايين على مستوى العالم
وهي مشكلة .. التصلب العصبي المتعدد المعروف بالام اس..!!
نرجع لليله اللي ماطلع فيها قمر
واللي حفرت فيها الكور البيض المتمرده نفق ودخلت غشاء المخ
في غفله من الجهاز العصبي
وراحت تتسلل للمايلينات وتتقطعها وتعذبها وتصلخ جلدها
واللي لهالاسباب العصبونه تتوهق!! والاشاره الماشيه فيها ماتلقى حاجز يمنعها بعد حالات اغماء المايلينات
وتفلت لأماكن مجهوله وتصير حوادث تصادم مؤسفه
وبالتالي الاشاره اللي رايحه تشغل العين مثلا .. ماتروح للعين مباشره
لأنها تتلامس وتتصادم مع اشارات ثانية
وتبدا مأساة صاحب هالجسم
العصبونات تستنفر وتقعد تصيح
لحقوا علي … إلحئوووني
النجده
العصبونه المسئوله عن اللمس
فجأه داشه عليها اشارة العصبونه المسئوله عن الحركه
تقولها حبيبتي انتي مضيعه
انا مو أمج
والاشاره العصبونية تبجي
أبي أمي .. أبي أبوي .. أبي مايلينتي
وتوقف حاسة اللمس عند هالبني آدم
لأن العصبونه من الصبح تفهم هالاشاره انها مو أمها
وان المكان خطر عليها
ولازم تنطر الكورتيزونه تجي وتوديها امها
العصبونه الحركية
المعركة حامية الوطيس
العصبونات المصابه بمايليناتها تنقل اشارات خطأ
وبالتالي تصير أزمة واختناقات مرورية بالجسور والانفاق والطرق السريعه
وتتوقف الاشارات اللي تصدرها العصبونات .. المعروفه بالاعصاب .. نتيجة الاختناق المروري للاشارات العصبية
وتتأخر طلبيات الجهاز العصبي المطلوب ارسالها لتنفيذ مهام تشغيل الحواس بالجسم
على حسب منطقة الاختناق المروري
تستمر أعراض هجوم الكور البيض وحرب الاباده على المايلينات واتلاف ارساليات العصبونات
لغاية تدخل الصديقه .. كورتيزونه
واللي توقف تنظم المرور وتطرد الكور البيض المجرمه لغاية لما تتطمن ان العصبونات تقدر توصل الطلبات اللي تستلمها من الجهاز العصبي.
وتستمر الحياة ..
بس هالمره .. العصبونات قاعده على أعصابها .. خايفه من هجوم آخر مباغت .. تدبره الكور البيض .. بليل.
