وساوس متصلب
من قديمنا الجديد مادري جديدنا القديم .. اللي هو .. المهم اني تطرقت لهالموضوع في وقت سابق ومكان آخر .. وكانت وساوسي التي لايعدو كونها هرطقة متصلب .. بسبب ماأعانية كأحد أعراض التصلب العصبي المتعدد
( فقدان التركيز والحكم على الأشياء والمنطق) :
وساوس متصلب
صارلك عارض … صح؟
رحت يم الطبيب .. اللي يداوي الجروحي .. صح؟
بنتجاوز معاناة التشخيص والعمر المهدور بالبحث عن اجابة للمعاناة ..
ونقول انهم شخصوك ..
وعطوك كورتيزون ..
وخذوا من عصعصك عينه ..
وقالولك مبروووك .. جالك ولد ..
أقصد ام اس..
طبعا … صدمة ..
رحت تبحث عن هالمرض بالقوقل
وفجأه لقيت هالمنتدى ..ورحت تبوس شعار قوقل مثل المجنون
وفتحت المنتدى وسجلت فيه بدون ادنى تردد (بالعاده الواحد يفكر ألف مره قبل انه يسجل بمنتدى)
تلقا في ذبانه على خشمك وانت مو معطيها وجه .. لأن حواسك كلها مركزه على كنز .. كبير .. فيه حياتك كلها ..
رحت تتلهف تشوف اي مشاركه عن اي واحد او وحده عنده عارض معين يشبه العارض اللي عندك (او العوارض) ..
تفتح درايش شكثر على الشاشه لكل موضوع تحس انه يهمك ..
وتتفاجأ ان ذاكرة الجهاز ماتتحمل .. لأنك فاتح كل مواضيع المنتدى
تحس انك تبي كل شي .. وتبي تقرا كل شي .. وتبي تحظن كل الموجودين
احيانا تستغرب وانت تطالع للمنتدى والناس اللي فيه .. وتقول .. وينكم من زماااااااااان .. ليش محد يعرفكم ..
بعديييييييين .. تعرف الاجابات عن كل اسئلتك (العبيطه)
شفت مشاركة من وحده عندها تنميل بجنبها الايمن ..
حسيت .. ان جنبك بدت تنمل … ويمكن صارت نبضات قلبك سريعه ..
لقيت ردود على معاناة هالمريضه .. تقولها .. عندنا وعندج خير ..
ويطلع واحد من الاعضاء ويقول انا عندي تنميل بذراعي اليسار .. ووحده ترد وتقول وانا رجلي اليمين متخدره .. وتلقى تعليقات ظريفه .. من هالمرضى اللي عندهم هالتنميل ..
وفجأه تحس ان التنميل اللي توك حسيت فيه .. اختفى ..
وصرت نشيط .. وطقت براسك تسويلك كوب نسكافيه .. احتفالا بزوال الغمه.
بس فيه مشكله ..
قاعد تحس بوخز براسك .. وكل ماتركز تحاول تحدد مكان هالالم اللي كأنه ابره مغروسه براسك .. يبدا يزيد .. ويزيد .. وفجأه تحس ان جسمك طاح .. وان طاقتك صارت صفر ..
وتنفسك بدا يضيق ..
وينتقل الالم لمكان ثاني براسك .. بعدين تحس بثقل براسك .. وتحس ان الالم صار لايحتمل …
والتلفزيون شغال .. وفيه تقرير اخباري عن اورام المخ .. وفجأه تحس ان هالكلام ينطبق عليك حرفيا .. وتبدأ حالتك النفسية تتعب.. وتفكر بنهايتك .. وان الألم اللي يزيد براسك دليل على ان الورم كبير ..
وتبدأ تفكر بكل الاحتمالات .. انك تسوي عملية .. وتفشل .. وان ايامك صارت معدوده ..
وتبدأ بالاكتئاب .. وتلتجيء للصلاة والدعاء ..
وتروح تبي تسوي خير وتساعد غيرك بالمنتدى ..
وتبدأ تحاول تخفف عن المفجوعين .. اللي عندهم تنميل والا شد بالعضلات .. وانت تقول لنفسك .. والله ماعندهم سالفه .. تنميل ومفجوعين؟؟؟
وانت تعتقد ان مافي احد عنده مصيبه مثلك …
واثناء رحلة التخفيف عن الآخرين …
تتفاجأ . بواحد .. يقول .. ان عنده آلام براسه … نفسك بالضبط … وانه راح وفحص .. وقالوله هذا من توابع الام اس .. وان الصداع هذا عادي ..
تبدأ رحلة الأمل معاك .. تروح تبحث أكثر .. تلقى شكثر نفس حالتك !!!
يعني .. انت مكبر الموضوع .. وشخصت نفسك .. وأكدت لنفسك ان ايامك معدوده .. واكتئبت .. وخطيت نهايتك بإيدك .. وبالنهاية .. يطلع الموضوع (عادي) ……..
يعني لو ما هالولد عرض مشكلته .. ولو ماتم الرد عليه من مرضى يعانون نفس حالته .. وانهم فحصوا وطلعت النتيجه صداع عادي .. يعني كنت بتمووت؟
تبدأ رحلة الأمل من جديد .. وبعنف هالمره .. وتبدأ تطلع أكثر وتستعرض مواضيع ومشاركات وابحاث عن الام اس .. وترتاح .. وتحس انك فاهم اكثر من الدكتور …
لكن … في يوم حسيت ان بطنك في الام غريبه .. وتبدأ تتحسس عليها .. وتحس بنبض غريب ببطنك .. وتبدأ تدقق اكثر واكثر .. وتحس ان هالالم ماراح من يومين ..
وتبدا تسمع عن اورام المعده والقولون .. وتبدأ وساوسك من جديد…
ياليل ماطولك …
صرت تخاف تاكل او تشرب … صرت تحس بكتله ببطنك غريبه …
تبدأ تشخص نفسك .. وتقول .. هذا مادرسناه بالام اس .. هالامتحان مو من المنهج …
محد تكلم عن البطن
كله عن التنميل والعضلات والعيون
هذه مو ام اس .. هذا شي جديد خطير.. هذا ورم ببطني
وتبدأ الحالة تنتكس …
تروح تلعن ابو القوقل والمنتديات السخيفه اللي كلها نقل بنقل ومعلومات سخيفه …
وفجأه يطلعلك واحد بمنتداك مريض بالام اس .. يتكلم عن هالشي معاه…
سبحان الله .. كأنه يتكلم عنك .. ويقولك انه فحص وطلع معاه قولون عصبي
وهذي بالضبط هي اعراضه … وتبدأ رحلة الأمل من جديد ..
تقعد من النوم … تحس انك ماتشوف عدل .. وان عيونك تشوف ابيض واسود .. وتبدأ مرحلة الوساوس ….
لحظه .. ستوب .. ماراح أكرر مراحل الاكتئاب والموت البطيء ..
تبدأ تبحث بالمنتدى .. تلقى مريض بالام اس عنده نفس القصه .. وبعد فقد نظره .. وقال انه تعالج وردت حالته احسن من اول ..
وتلقاك تطالع الشاشه بعين وحده .. وبالغصب …
بسه هالمره غير … هالمره .. تدري ان فيه غيرك صار فيه اسوأ من هالشي بعيونه وتحسن .. وفوق هذا كاتب قصته بنفسه بكل مرح وهدوء …
وتبدأ نهاية الوساوس معاك .. وتكون على يقين .. ان الاعضاء بمنتدى التصلب تطرقوا لاخطر المسائل ونشروا قصصهم .. واللي قروها .. ردتلهم الحياة ..لأن الوساوس بدت تنهش باجسادهم … وردت لهم الحياة .. بسطر كتبه مريض عن تجربته…
دعوه لكل الاعضاء .. بنشر وساوسهم … لعل وعسى .. يظهرلك احد الاعضاء عنده نفس المشكله ويدلك على الطريق الصحيح..
وفجأه .. تحس ان فيك ……… والا خلاص .
( دعوه … للافصاح عن وساوسك .. التي ستتفاجأ انها مجرد أوهام)
